Kategorien artxiboak: 20H baietz

“Liburuforum”: “Jenisjoplin” Uxue Alberdi (2018-11-29)

Gogoratzen duzu? AZAROAREN 29an,ostegunarekin, arratsaldeko 19:00etan, Intxaurrondo Kultur Etxean, Uxue Alberdiren Jenisjoplin liburuaren tertulia literarioa izango dela, Iratxe Retolazaren eskutik.

2018-11-29 Azaroaren 29an
JenisjoplinUxue Alberdi  2017, nobela

https://zubitegia.armiarma.eus/?i=761

“Hola, pasibotasunari uko egiten dio eta niaren ugaritasunek espazio fisikoa topatzen dute, gorputza biolentzia, memoria, sexu, maitasun, desio eta gorrotoaren elkargune bihurtuz; gorputzaren markak azalean.”

 
 
Liburua irakurtzeko astirik orain arte izan ez baduzu ikusi laburpen hau. Baietz irakurri! astebete duzu!
Gorputz markak Iratxe Esparza / Gara, 2017-10-21

Eleberria 2010eko udan abiatzen da; Libre irratiko kideak terrorismoaren goraipamena leporatuta noiz atxilotuko dituzten zain daude. Horietako bat Nagore Vargas protagonista da. Nagoreren ahotsak borroka armatuaren gainbeheraren lekuko diren belaunaldien kontraesanak biltzen ditu eta identitate kolektiboaren aztarnak bere azalean pausatzen dira barnea ukitu arte. Alabaina, hiesa diagnostikatzen diote eta horrek bestelako gertakariak erabat zeharkatu eta bizitzarekiko begirada aldarazten dio. Hiru atalek osatzen dute liburua, eta guztietan Euskal Herriko errealitate ezberdinak margotzen dira, euskal gatazkatik baino harago doazenak. Neurriz jokatzen du Uxue Alberdik eta interesgarria da liburuan klase borrokari eta maila sozialari eskaintzen zaien espazioa edota gaixotasunaren inguruan dauden tabu moralak agerian uztea. Testuan hari gehiago ere pilatzen dira, hala nola, protagonistaren haurtzaro berezia, ohiko eredutik kanpo dagoen familiaren gorabeherak edo bazterkeria sozialak dakarren krudeltasuna. Haietatik sortutako emozio bakoitzak bide desberdinak hartzen ditu protagonistaren gorputzean itsatsi arte.

Hasieratik, gaixotasunak lekua irabazten du kontakizunean, eta erantzunen bilaketak Nagore oroitzapenetan zulatzera bultzatzen du, lasaitasunez iraganean arakatzen hasiz. Irakurketan iradokitzen da Uxue Alberdik sakonki eta oreka mantenduz egituratu duela testua eta, esan gabe doa, hari nagusiari darizkion adarren ugaritzeak izugarri aberasten duela eleberria. Nagore Vargasek bere bizipenen hainbat egoera kontatzen ditu eta, aitortzen ez badu ere, urruntasunetik eta perspektibaz iraganaren berrikuspena egiten du, ziur aski hori baita etorkizunari aurre egiteko topatzen duen taktikarik egokiena, gaixotasunaren oihartzunari harrotasunez aurrez aurre begiratzea, alegia. Dena dela, ez pentsa istorioa dramatismotik idatzita dagoela; Nagore bizirik dirauen emakumea da eta diagnostikoak bere gorputzaz erabakitzeko zilegitasuna ematen dio; gainera, bizitzak dakarrena erresistentziatik asimilatzeko indarra ere badauka etsipena alde batera utziz. Horri lotuta, deigarria da protagonistak erakusten duen argitasuna eta ziurtasuna, sarritan, besteak urduritzen dituztenak. Bestalde, irakurri ahala narrazioak intentsitatean irabazten badu ere, pasarteren batean Nagoreren ahotsak talka egiten du hirugarren pertsona darabilen narratzailearenarekin, eta elkartze mehe horretan zerbaitek huts egiten duelakoan nago. Aldiz, ñabardurak ñabardura eta batzuetan istorioaren zenbait atal goxoegiak izan arren, Alberdik sustatzen duen hausnarketa oso onuragarria da, gorputzak eta narrazioak bat egiten dutelako etengabe, areago, gorputza istorioaren gidaria izan dela baieztatzera ausartuko nintzateke.

Gogoetan dabilela, Nagore Vargasek (aitak JenisJoplin konplizitate ezizena erabiltzen du) identitatearen birplanteamendua aipatzen du, gorputz analisiaren bidez gauzatzen duena, esan bezala, gorputza eleberriaren erdigunean kokatuta agertzen zaigulako. Adrienne Richek, poeta eta saiogileak, gorputzetik abiatzen den kokaleku-politika proposatu zuen, eta irakurketan zehar ideia horrek lagundu dit. Gorputzak jasaten duen tratamenduak munduarekin sortutako harremana zehaztu eta, era berean, munduaren ikuspegia ere baldintzatzen du; hain zuzen ere, Nagore Vargasi gertatzen zaiona: bere gorputzetik eusten du, interakzio pertsonalek, sentimenduek eta bizipenek gorputza bera markatzen duten bitartean. Hola, pasibotasunari uko egiten dio eta niaren ugaritasunek espazio fisikoa topatzen dute, gorputza biolentzia, memoria, sexu, maitasun, desio eta gorrotoaren elkargune bihurtuz; gorputzaren markak azalean.

Aurtengo beste datak eta aukeratutako liburuak hauek izango dira:

 

 

 

 

 

2019-01-31  Urtarrilaren 31n
Honetara ezkero“.  Arantxa Iturbe   2017, ipuinak

2019-04-08  Apirilaren 8an
“Bihotz handiegia”.   Eider Rodriguez 2017, narrazioak

2019-05-21 Maiatzaren 23an
Bidean ikasia”.   Arantxa Urretabizkaia  2016.Entsaioa

Baietz 20 egun euskaraz Intxaurrondon (azaroaren 12tik abenduaren 2ra)

Zer da baietz 20 egun euskaraz?
Informazio guztia hemen: http://www.plazaragoaz.eus/

Auzo-erronka da, euskaraz ulertzen edo hitz egiten duten intxaurrondotar guztiei zuzendua. Batzuei, euskarari eustea proposatzen zaizue (ahobizi), eta besteei, eusteko hautua egin dutenak animatzea eta laguntzea (belarriprest). Azaroaren 12an hasi eta abenduaren 2an amaituko da. Hurrengo egunean, abenduaren 3an, euskararen eguna ospatuko dugu.

Baietz 250 ahobizi

Parte hartu! Eman izena!

Euskarazko jokaera aktiboa hartuz, euskarari eutsiko dioten auzotarrak dira. Astebetez, euskaraz egingo diote ulertzen duenari.

Baietz 500 belarriprest

Ahobizien euskarazko aktibotasuna ondo hartzen dutela adierazi duten auzotarrak dira, hau da, dakienari euskaraz aritzeko gonbitea egindo diote.

3 aste, 20 egun

Erronkak iraungo dituen 20 egunak 3 astetan banatuko ditugu. Belarriprestek, erronkak dirauen 3 astetan jokatuko dute belarriprest modura. Ahobiziek, berriz, astebeterako emango dute hitza.

Erronkan parte hartzeko baldintzak

Intxaurrondon jaio, bizi edo lan egitea.
16 urtetik gorakoa izatea.
Izen-ematea (diptikoan edo web orrian).

Informazio guztia hemen: http://www.plazaragoaz.eus/

Hasi da Korrika, hasten gara #baietz20

20. Korrika hasi da eta iritsi da auzoari egindako erronka betetzeko gai garen ikusteko egunak. Baietz 20 ordu euskaraz Intxaurrondon!!
Gaur eta bihar ekitaldi ugari izango ditugu Bernart Etxepare plazan jarritako karpa ederrean (11:00-21:00).
Leku goxo eta atsegina prestatu dugu.

Larunbatean, 13:00etan, erronkaren bigarren zatia aurkeztuko dugu eta ondoren bazkaria izango dugu (4 eta 8 euro).

Guztiok gaude gonbidatuta. Euskarak batzen gaitu!

Informazio gehiago:

#baietz20 EGITARAUA

Baietz 20 ordu euskaraz Intxaurrondon!
EGITARAUA

Martxoak 31 Bernart Etxepare plazan
08:30 Karparen apainketa
11:00 Ekimenaren hasiera
11:05 Korrika txikia
12:00 1.ordua Korrika eta txantxangorria kanten dantzak
11:30 Gaztetxoen korrika (Lauaizetatik abiatuta)
13:00 2.ordua
13:05 Gazteen erromeria
14:00 3.ordua
14:05 Bazkari autogestionatua: bakoitzak etxetik ekarritako janaria plazan bazkaldu
15:00 4.ordua
15:05 Antzerkia, bertsoak eta dantza LHko ikasleekin
16:00 5.ordua
16:15 Argazki-proiekzioa, nola pasatzen den denbora!
17:00 6.ordua
17:05 Tailerrak eta jolasak Haurtxoko eta Gaztelekuaren eskutik
17:10 Kantu-jaia: Manolo Urbietari omenaldia
17:40 Loreak Taldea, kontaketa musikatua
18:00 7.ordua
18:05 Suhiltzaileen erakustaldia
18:20 Argazkia jendetsua eta txokolatada
18:30 Mintzodromoa + Auzoko
19:00 8.ordua
19:30 Aldeta Taldea
20:00 9.ordua
20:05 Kaña2Kaña trikitilariak auzoan zehar
20:15 Dantza plaza dinamizatua
21:00 10. ordua
21:05 Egunari agur! Bihar arte aio, bihar arte aio!

Apirilak 1
11:00 Egunaren hasiera eta aurkezpena
11:05 Diana dultzaineroekin
11:10 Zumba. Esnatu gorputzak!
12:00 11. ordua
12:00 Hartu mapa eta poltsa berdea eta egin erosketak auzoan
12:00 Uliako mintegietan parkeko zuhaitzekin jolasten. Ezetz 10 asmatu! (Mintegietan bertan)
12:00 EUSKARA AUZOKO HISTORIAN eta Joxean Coyaren bideoa
12:30 DOTAKE Txaranga eta INTXAURRONDO KANTUZ
13:00 12. ordua
13:05 EKITALDI NAGUSIA
14:00 13. ordua
14:05 Goazen txarangaren atzetik auzoan zehar!
14:30 Bazkaltzera! Zaporeak taldeak egindako bazkari goxoa. (erosi txartela lehenbailehen)
15:00 14. ordua
16:00 15. ordua
16:05 Karaoke herrikoia
17:00 16. ordua
17:05 Gazteen antzerkia
17:30 Herri kirol herrikoiak: probatu lokotx biltzea, sokatira, txingak …
18:00 17.ordua
18:30 Urban 13ren Performancea
19:00 18. ordua
19:05 Zirko tailerrak: malabareak, kariokak, hankapaloak …
19:30 Intxaurtze kantariak otxotea
20:00 19. ordua
20:05 Kimikari eta Parásitos XXL eta DJ Josu
21:00 20.ordua
21:00 AMAIERAKO EKITALDIA

#baietz20 zirkua eta Korrika

Korrika datorren astean hasiko da
baita… “Baietz 20 orduz euskaraz Intxaurrondon” erronka ere!

Auzoko hainbat elkarte, ikastetxe, eragile eta norbanako bildu gara ” prestaketetan ari gara.

Martxoaren 31n (ostirala) eta Apirilaren 1ean (larunbata) 20 orduz betetako egitasmoa dugu.  Egun gutxi barru jasoko dituzue xehetasunak. Bitartean, aurrerapentxo bat:

  • Korrika txikia, Korrika gaztea, Gazteen erromeria.
  • Antzerkia, bertsoak eta dantza, bai ikasle bai helduen aldetik.
  • Tailerrak, jolasak, Kantu-jaia
  • Abeslariak, trikitilariak, Dantzatzeko aukera
  • Bideoak.
  • BAZKARI HERRIKOIA (Larunbatean, apirilaren 1ean, 4€/8€. Tiketak salgai taberna hauetan: Erdikoa, Zulo Zahar, Leku Eder, Talai, Eder, Extremeño, Adi, Sagasti)

NON??? BERNART ETXEPARE PLAZAN,

Karpa bat jarriko dugu!!!  Ikusi duzu kartelan?
Gure karpa, gure zirkoa. Bai!!
Aurten “Zirkorrika” datorrenez, Zirkua izango da hari nagusia, beraz mozorroak ongi etorriak izango dira: sudur gorriak, pelukak, zapata superluzeak, gizaki super-indartsuak, emakume bizardunak, hezitzaile eta lehoiak, ekilibristak, malabaristak, akrobatak, … baietz, mozorrotu gabe etor zaitezke 😉

Girotzen hasi, mingaina dantzan jarri eta mezua zabaldu.
Mezua zabaldu: #baietz20

20 baietz bilera asteazkenean 19:30erako, martxoak 15

Asteazken honetarako, 19:30erako jarri genuen hurrengo hitzordua. Baditugu zenbait ohar egun horretarako:

  • Hitza-koek martxoaren 31n gehigarri berezia aterako dute korrikari buruz, eta 20 orduko erronkaren gaia erreportaje batean argitaratu nahi dute. Horretarako, kazetariarekin hitzordua asteazkenean, 18:30ean jarri dugu gure lokalean. Ahal dugun gehienok agertzea komeni da.
  • “Intxaurrondon Baietz 20 ordu Euskaraz ! (Egitaraua)” izena duen dokumentua atxikita doa. Moldaketak egin dira, komentatu beharreko puntutxoak ere ageri dira. Begiratu!
  • Jendearengana mezua zabaltzen hasteko irudia ere dantzan jarri dugu. Zabaldu!
  • Aurkezle lanak egiteko taldetxoa ere lotzen ari gara, gogoan norbait badugu komentatu.

Bukatzeko, udaletxean aurkeztu zen dokumentua ere gehitu dugu. Bertan agertzen den egitaraua ez da azkena.

Kartelaren azken irudia asteazkenean!!

Beno, ongi bizi eta asteazken arte!!

Antolatzen: INTXAURRONDON 20 orduz BAIETZ! (martxoa 31, apirila 1-2)

Hasi gara antolaketarekin, urtarrilaren 25ean hamalau pertsona elkartu ginen.

Ikusi Gotzonek egindako kartelerako proposamena.  Horko datuak eta leloak hurrengo bileran erabakiko ditugu

Ikusi martxoaren 31ko (ostirala) eta apirilaren 1erako (larunbata) ekintzen taula ere. Hauek ere hurrengo bileran komentatuko ditugu.

Hurrengo bilera: otsailak 8, asteazkena, 19:00etan.
Egitarauaren jarraipenaz gain, asteartean Lasarten jasoko dugun informazioa ere komentatuko dugu, eta leloa, hurrengo erronkarako mezuak, aukerak erabaki beharko lirateke.

INTXAURRONDON 20H BAIETZ! Martxoaren31an. Lagundu antolatzen ;-)

lagun asko bildu ginen abenduko bileran. Urtarrilaren 12an berriro!

Abenduaren 15ean “20 ordu euskaraz bizitzeko” erronkaren inguruan hitz egiteko jende mordoa elkartu ginen.
INTXAURRONDON 20H BAIETZ!” aurrera doa !!!

Martxoaren 31 eta apirilaren 1ean antolatuko dugu.
Gune nagusia “Bernart Etxepare” plaza izango da.
Helburu nagusia? Euskararen erabileran eragitea.

Edozein ideia ongi etorria izango da.
Nola bete 20 orduak?
Taldeak antolatuko ditugu egitasmoa modu eroso eta eraginkorrean aurrera eramateko.
Animatu hurrengo hitzordura:
datorren OSTEGUNEAN, urtarrilak 12,  “Euskararen Plaza” lokalean, 19:00etan.

Ongi bizi!!!