Kategorien artxiboak: Sailkatugabeak

NOLA EMAN PAUSO BAT AURRERA 2019an?

ZER: Helburuak / Ekintzak / Ideiak / Iritziak jaso nahi ditugu. Ideiak bota. Bat-batekoak edo landuak, guztiak izango zaizkigu baliagarriak. Bakoitzak errealitatearen zati bat bizi du eta ikuspegi horiek guztiak interesatzen zaizkigu puzzlea osatzeko.

Zer egin dezakete hurrengo urtean/urteetan hizkuntza berdintasuna bermatzeko eta euskararen erabilera sustatzeko arlo hauetan?

Zer egiten dute beste lekuren batean gurean ere egin dezakeguna?

Zer egiten dute beste arloren batean hizkuntza berdintasunean ere lagungarria izan dakigukeena?

NOLA: Hobeto datorkizun bidea erabili gurekin harremanetan jartzeko.

 

Zuk aukeratu noiz eta nola:

lotura honetan sartu eta idatzi
Telegram edo WhatsApp bidez: 628552066
e-posta: plazaragoaz@gmail.com
Twitter kontura: @PlazaraGoaz

Eta, nahi baduzu, zure lagun, lankide eta senideei ere bidal diezaiekezu, haiek ere parte har dezaten.

ZERTARAKO: Helburuak eta ekintzak bateratzen eta forma ematen saiatuko gara, ondoren, eragindako instituzio, elkarte, erakunde edo enpresei helarazteko.

Jasotako ideia guztiak aurkeztu eta aztertuko ditugu otsailaren 13an, asteazkena, 19:00etan, Plazara Goazen lokalean egingo dugun bilera irekian.

ZERGATIK: 2019 urtea garrantzitsua izango da. Izan ere, maiatzaren 26an hautatuko ditugu ordezkari politiko berriak (Udalean, Aldundian eta Europan), Donostiako 2015-2019 Plan Estrategikoaren epealdia amaituko da, Korrika urtea da, litekeena da Euskaraldiaren bigarren kanpaina bat ematea… Gertaera horiek eragina izango dute komunitatearen etorkizunean eta interesatzen zaizkigun gaiak plazaratzeko aukera eskainiko digute. Eragin dezakegu.

2017 urtean 20 egun euskaraz egin genituen eta 650 auzotarrek hartu genuen parte. 2018an Euskaraldia egin dugu eta kopurua bikoiztu dugu: 1.355 biztanlek parte hartu dugu, 908 Ahobizi eta 447 Belarriprest. 16 urtetik gorako bizilagun euskaldun eta ia euskaldunen %16.

Oso garrantzitsua izan da. Inguruan eragiteko gai garela erakutsi dugulako. Gehienok lortu dugu euskara gehiago hitz egitea familiako, lagunarteko edo laneko baten batekin. Zoriontzeko eta ospatzeko lorpenak dira, baina, beste arlo askotan bezala, bakarka egin dezakeguna baino gehiago lor dezakete instituzioek eta erakundeek. Kontzientzia dugunok gure ingurune hurbilean eragiteaz gain, prestigioa eta arauak behar ditugu, euskaraz hitz egitea ez baita norbanakoak egin dezakeen zerbait, taldean egiten da, politikoa da.

Gogoan izan, Donostian 17.659 pertsonek hartu dugu parte Euskaraldia. Hauteskundeetara aurkeztuz gero, 5 ordezkari izango genituzke. Zer gertatuko litzateke indar hori instituzioen agenda politikoan eragiteko erabiliko bagenu?

Eman dezagun pauso bat aurrera, aldaketa handiagoak eragiteko.

——

ERANSKINAK

Baten batek inspirazio iturriak beharko balitu, jarraian ditugu hausnarketarako eta ideiak hartzeko lagungarriak izan daitezkeen hitz gako, dokumentu eta bestelako batzuk:

  • Intxaurrondoko eragile nagusiak: Aiton-amonen etxea / Anbulatorioa / AGIFUGI – Ijito elkartea / APLE – Luso Euskalduna elkartea / Artzak ortzeok elkartea / Arzak jatetxea / Bozkozaleak (danborrada bakarrik) / Danborrada Irurak / Ekialdeko Barrutia (Altza, Bidebieta eta Intxaurrondo) / English school / EuskoTren tren geltokia / Centro Extremeño / Haizalde elkartea / Inter kirol elkartea / Intxaur txiki / Intxaurdi kirol elkartea / Intxaurra elkartea / Intxaurrondo berri emakume elkartea / Intxaurrondo hegoa ikastetxea / Intxaurrondo ikastola / Intxaurrondo kiroldegia / Intxaurrondoko katekesia / Intxaurrondoko kultur etxea / Ipar haizea / Izbe / Intxhaurgunea / Lagunak emakume elkartea / Larrotxene kultur etxea / Lauaizeta ikastola BHI / Letaman gaztetxea / Mª Auxiliadora ikastetxea / Marrutxipi elkartea / Mons elkartea / Mons kiroldegia / Plazara goaz / Renfe tren geltokia / Santa Teresa haurtzaindegia / Zulo zahar elkartea / 150 establezimendu inguru.
  • Kontuan hartzeko ikuspegi batzuk:
    • Erabilera / Ezagutza / Motibazioa / Erakundetzea edo Arautzea
    • Adinak: Haur / Nerabe / Gazte / Heldu / Adineko
    • Genero ikuspegia: Emakumezkoak / Gizonezkoak / Ez binarioak
    • Euskararen ezagutza eta jarreraren arabera: Euskaldun alfabetatuak / Ez alfabetatuak / Ikasten ari direnak / Ez dakitenak
    • A / B / D ereduko ikasleak. Lehen Hezkuntza / DBH / Lanbide Heziketa / Unibertsitatea / Etengabeko prestakuntza…
    • Beste ezaugarri edo eremu batzuk: Familia bidezko transmisioa / Guraso bakarreko familiak / Arazoak dituzten familietako haurrak / Langabetuak / Migranteak / Jubilatuak / Itsuak / Aniztasun funtzionala dutenak / Administrazioa eta Udalaren zerbitzuak / Kulturgintza / Hedabideak / Teknologia berriak / Prestigioa / kontzientzia
  • Donostiako datu soziolinguistikoak: Lotura
  • Euskararen adierazle nagusiak: Lotura
  • Donostiako Udalak euskararen inguruan onartutako arauak: Lotura (Donostiako Udalean eta udalerrian euskararen erabilpena normalizatzeko arauak / Donostiako Euskararen Plan Orokorra. 2015-2019 eta Euskararen Erabilera Normalizatzeko Plana Donostiako Udalean – 6. Plangintza aldia (2018-2022)).
  • Donostiako Udalaren Hizkuntza jarraibideak: Lotura / Eta hizkuntza gehiago daudenean: Lotura
  • Donostiako Udalaren aurrekontu proiektua 2019 urterako: Lotura (Euskararen sustapena eta normalizazioari bideratutako atalaz gain, hizkuntza zehar-lerro gisa landu daiteke eta gainontzeko ataletako ekimenetan txertatzea proposatu).
  • Eusko Ikaskuntza. Euskararen Etorkizuneko Eszenarioak Elkarrekin Eraikitzen (e5): Lotura. Egitasmo horren barruan: 2040 urterako irudikatutako Kapitalen (Aktiboen) Konstelazioak Eraikitzeko Ekinbide Gakoen Mapa: Lotura
  • Kontseiluaren proposamenak: Lotura

 

Zeri kantatzen diogu? Zeri ez? (G. Barandiaran & R. Rueda. Asteazkenean)

Hitzen_Ahairea_2018_Gotzon_Barandiaran_Rafa_Rueda Noiz: azaroaren 7an, asteazkena
Ordua: 19:00-20:30
Non: LARROTXENE Kultur Etxean,
Nor: Gotzon Barandiaranen eta Rafa Rueda
Prezioa: Dohanik
Jakin nahi al duzu zeri kantatzen diogun euskaldunok?
Eta zeri ez?
Plazara Goazek 20 urte bete dituela ospatzeko eta Euskaraldiaren kanpainaren barruan
Gotzon Barandiaranen eta Rafa Ruedaren hitzaldi musikatua izango dugu.
Bertan, Hitzen ahairea liburuan azaldutakoaren berri emango digute.
Liburua eta aipatutako kantuei buruzko informazio gehiago:
Euskaraldia?
Ariketa sozial honetan parte hartzera gonbidatu zure hamaikakoa: familia, lagunak, lankideak…
Hizkuntza ohiturak eta kontzientziak eragin!!

Literatura Plazara solasaldiak 2018/19ko liburuak eta datak

LITERATURA PLAZARA 2018-2019 solasaldiak
Iratxe Retolazak gidatuta
Saio guztiak Intxaurrondo Kultur etxean (Goiko kiroldegian), ostegunarekin, 19:00etan

Aurtengo datak eta aukeratutako liburuak hauek izango dira:

 

 

 

 

 

2018-11-29 Azaroaren 29an
“Jenisjoplin” Uxue Alberdi  2017, nobela

2019-01-31  Urtarrilaren 31n
Honetara ezkero“.  Arantxa Iturbe   2017, ipuinak

2019-04-08  Apirilaren 8an
“Bihotz handiegia”.   Eider Rodriguez 2017, narrazioak

2019-05-21 Maiaztaren 23an
Bidean ikasia” Maiatzaren 23an.   Arantxa Urretabizkaia  2016.Entsaioa

Azken txanpa. Baietz 20 egun euskaraz

Baietz 20 egun euskaraz Intxaurrondon egitasmoaren azken txanpan gaude eta abenduaren 1 eta 2rako antolatu ditugun ekitaldiak gogorarazi nahi dizkizugu:

Abenduak 1. Tokia: Euskararen plaza. Bernart Etxepare plaza.

17:00etan: Haur jolasak.
19:00etan: 3. TXANDA ALDAKETA.
Ondoren, Gaztaina erreketa eta Kaña2kaña taldea.

Abenduak 2. AMAIERA JAIA. Tokia: Intxaurrondo Kultur Etxea

13:30etan: Ekitaldia
14.30etan: Bazkaria.
Txartelak 7 eurotan salgai ondorengo tabernetan: Eder, Talai, Adi, Sagasti, Lekueder, Zulozahar, Erdikoa

Horrez gain, euskararen eguna dela eta, gaur arratsaldeko 19.30etan Larrotxene kultur etxean izango den Oholtza bertso-ikuskizunera joatera animatzen zaitugu.

Literatura Plazara 17/18 : Gure hiriko geografiak

Literatura Plazara solasaldiak  berrikuntzak dakartza aurten: urteroko hiru liburuei bi saio gehitu dizkiogu (liburu bat eta ibilbide literarioa + bazkaria)
.

LITERATURA PLAZARA 2017-2018 Iratxe Retolazak gidatuta
Saio guztiak Intxaurrondo Kultur etxean, ostegunarekin, 19:00etan

Aurtengo gaia:
Gure hiriaren geografiak
Hainbat liburu dira Donostia dutenak kokaleku
eta bertan irakur ditzakegu gure gizartearen eta kaleen geografiak, ez baita bakarra

2017-11-16
Gauak eta hiriak Ur Apaletegi Idirin
Erein argitaletxea. 256 or.
Felix, Antton eta Muriel gazteak dira eleberri honetako pertsonaiak, eta gaztaroaren heziketa sentimental osoa biltzen da hiruren arteko harremanetan: maitasuna eta jelosia, adiskidetasuna eta gorrotoa, baita bizitzako sasoi horretan hain ohikoak diren konplexuak ere. Nahiak eta ezinak. Gaua, hiria eta gaztaroa dira, beste maila batean, eleberriko protagonista nagusi eta boteretsuak. Esan gabe doa, gaua nagusitzen denean gazte jendeak hartzen ditu kale, taberna eta pubak. Kale horietan sortu, garatu eta mamitzen dira maitasuna eta gaztetasunaren irrika eta afanak. Oso giro urbanoa eta urduria da eleberriaren muina. Horrekin guztiarekin batera, giza sentimenduetan barneratzeko zorroztasuna da eleberri bizi, egun-eguneko eta sikologikoki kupidagabe honen ezaugarririk aipagarriena.
http://www.erein.eus/liburua/gauak-eta-hiriak
http://zubitegia.armiarma.eus/?i=196

2018-01-25
Etxekalte
Harkaitz Zubiri
Susa argitaletxea. 216 or.
Anaitasuna enpresa ez dabil ondo. Kontuak zehazki nola dauden inork ez daki, baina arazoak eta zurrumurruak zabaldu direnez gero, lorrintzen ari dira langileen arteko harremanak.
Josu bulegora itzuli denean, iradoki du lankide zuen aitaren heriotzaren kausa ez zela naturala izan. Norak afera horietan katramilatzeko gogorik ez duen arren, gaina hartu diote bikote ohiaren kezkek eta ikertzen hasi da. Deseroso daude ordezkari sindikalak. Zuzendariak Chicagotik etxera bueltatzeko eskatu dio Aingeru semeari, kinka larrian dagoen fabrikan aldaketa sakonak egiten lagun diezaion, baina makalduta dabil Donostiara iritsi denetik. Etxebek ez du bururik altxatzen bulegoko mahaitik, eta egunetik egunera urrunago sentitzen du Herrera adiskide kutuna.
Bizitza gurutzatuak kontatzen ditu Harkaitz Zubiriren nobelak. Krisi ekonomiko eta sozial garaian krisi pertsonal eta intimoetan trabatu direnek ihes egin nahi diote porrot gordinari, kosta ahala kosta.
http://www.susa-literatura.eus/liburuak/narr94
http://kritikak.armiarma.eus/?page_id=4003&non=libu_i&tes=etxekalte

2018-02-22
Nola heldu naiz ni honaino Kattalin Miner
Elkar argitaletxea. 128 or.
Enpresan mailaz eta soldataz igotzea, herentzia bat jasotzea, etxe bat erosi ahal izatea, lagun ugari edukitzea… Arrakastaren laukitxo guztiak beteak ditu Jezabelek, argi du zer nahi duen bizitzan eta zirt-zart hartu ohi ditu erabakiak. Halako batean, ordea, txikikeria batekin paralizaturik geratuko da. Emakume gazte baten nora eza darabil Kattalin Minerrek gure gizarteko hainbat gai giltzarri jorratzeko: familia eta bikote ereduak, heteroaraua, harreman batean bilatzen duguna… Nortasunez beteriko lehenengo eleberri bat, irakurlearen gogoa astindu eta zer pentsatua emango diona.
http://kritikak.armiarma.eus/?p=7161

2018-04-26
Bihotz bi. Gerrako kronikak Ramon Saizabitoria
Erein argitaletxea. 288 or.
Bikotearen istorioak osatzen du eleberriaren ardatza. Gizon eta emakumeen arteko harremanen inguruko gogoeta da eleberria, batik bat gizonezkoaren jokabide eta jarreren ingurukoa. Ironia da nobelagileak aukeran dituen lanabesetako bat, beharbada, garrantzitsuena; eta gertaeren markotzat, gutxitan bezala guztiz sinesgarria den hiri bat. http://www.erein.eus/libro/bihotz-bi/eu
http://kritikak.armiarma.eus/?p=2293

2018-0505
Gure hiriaren geografiak ibilbidea + bazkaria
10:00 abiatu Intxaurrondo Kultur Etxetik

Martxoak 24: Ez dok hiru (antzerkia)

Antzerkia
Izenburua: Euskal musikaren benetako istorioa
Eguna: Martxoaren 24an, ostirala.
Ordua: 8:00pm
Non: Intxaurrondo kultur etxean (goikoan)

Ikuskizun honetan berrehun euskal kanta baino gehiago agertzen dira (zatiak, noski!) eta denak ez bada gehienak, ezagun egingo zaizkizu. “Ez dok Hiru”, kantutegian oinarritutako ikuskizun teatrala da. Gure modukoa, eroa, deskonzertantea, irrigarria azalez… Baina azal horren poro bakoitzari geure musikarekiko maitasuna dario. Korrika Kulturalaren programazioaren barruan.

«Ze pisutara zoaz?». Igogailuan sartu dira bi pertsonaia: 48. solairura doa bata, 47.ra bestea. Isiltasuna gero. Ezeroso daude biak, zerbait esan behar, eta hasten da bata, azkenean, zerbaitekin: «Itsasoa laino dago». Besteak baietz: «Baionako barraraino». Segi batak: «Eurixe da, ha, ha». Eutsi besteak: «Bai, nausia, euria da/ gure lurra bustia da». Eta erdi kantuan jadanik: «Esan euriari berriz ez jausteko!». Batak segi: «Asteartea, euria goitik behera,/ lanik ez egiteko…». Eta biek bukatu: «… ez goaz lanera!». Euskal musikagintza hartu du ardatz oraingoan Patxo Telleriak eta Mikel Martinezek osatutako antzerki bikoteak, eta ohi duten bezain jostalari eta umoretsu landu dute gaia Ez dok hiru antzezlanean.  (Iñigo Astiz, Berria , 2017-03-01)

Antolatzen: INTXAURRONDON 20 orduz BAIETZ! (martxoa 31, apirila 1-2)

Hasi gara antolaketarekin, urtarrilaren 25ean hamalau pertsona elkartu ginen.

Ikusi Gotzonek egindako kartelerako proposamena.  Horko datuak eta leloak hurrengo bileran erabakiko ditugu

Ikusi martxoaren 31ko (ostirala) eta apirilaren 1erako (larunbata) ekintzen taula ere. Hauek ere hurrengo bileran komentatuko ditugu.

Hurrengo bilera: otsailak 8, asteazkena, 19:00etan.
Egitarauaren jarraipenaz gain, asteartean Lasarten jasoko dugun informazioa ere komentatuko dugu, eta leloa, hurrengo erronkarako mezuak, aukerak erabaki beharko lirateke.

IdatzizEsan tailerra urriaren 19an hasiko da :-)

IdatzizEsan tailerra abiatzeko taldea aurrera doa.
Interesik izanez gero, izena eman dezakezu oraindik.

Tailerra urriaren 19an hasiko da, eta irakaslea auzoan bizi den Felipe Juaristi idazlea izango da.

Saioak Euskararen Plazan izango dira, Intxaurrondoko Bernat Etxepare plazan,

Plazara Goaz elkartearen egoitzan, asteazkenero, arratsaldeko 18:00etan.

Zalantzarik izanez gero, jarri gurekin harremanetan.

IdatzizEsan tailerra Intxaurrondon, Felipe Juaristirekin

IDATZIZESAN tailerra

Irakaslea: Felipe Juaristi Galdos

idatzizesan_tailerra_kartelaIdaztea maite duzu?

Idazleen lana desegituratu, aztertu eta haiengandik ikasi nahi duzu?

Idazkera propioa eraiki edo hobetu nahi duzu?

Idazten ausartuko zara?

HELBURUAK

Nor bere idazkeraren jabe egitea, nork bere pentsamendua garatzen ikastea: euskal sintaxia menderatzea. Testuak idazten trebatzea: gutunak, komunikatuak, kazetari artikuluak, ipuin laburrak.

METODOLOGIA

Euskaraz idatzi dena aztertuko da, fotokopien bidez. Eta testu horiek aztertu ondoren, berriak eraikiko dira.

DATU TEKNIKOAK

Iraupena: 2 orduko 25 saio. Beraz, 50 orduko aurrez aurreko tailerra (horiei gehitu nork bere lanak egiteko erabiliko dituen orduak).

Eguna eta ordua: Asteazkenak, 18:00-20:00 (15′ atsedena)

Tokia: Euskararen Plaza (Plazara Goaz Elkartearen egoitza). Bernart Etxepare plaza. 20015 Intxaurrondo (Donostia)

Hasiera data: 2016-10-19        Amaiera data: 2017-05-17

idatzizesan_tailerra_egutegiaPARTEHARTZAILEAK

Tailerrean parte hartuko duten pertsonek euskaraz idazteko gaitasuna garatua izango dute (C1 maila).

IRAKASLEA

idatzizesan_tailerra_irakasleaMATRIKULAZIOA

Izena emateko epea: 2016-10-07

Matrikula egiteko bi pauso emango dira:

  1. BAGERA Euskaldunon Elkartearen webean sartu eta izena eman (izen-abizenak, telefonoa eta helbide elektronikoa) tailerrari buruzko atalean (https://www.bagera.eus/blog/idatzizesan-tailerra/

  2. 25 euroko diru sarrera egin Plazara Goaz Intxaurrondoko Euskara Batzordearen izenean dagoen kontu korronte honetan:

Kutxabank 2095 5143 2310 6984 0493 *Parte hartuko duen pertsonaren izena idatzi

ANTOLATZAILEAK

idatzizesan_tailerra_antolatzaileakinformazioa: idatziz_esan_tailerra_02

kartela: idatziz_esan_tailerra_intxaurrondo_2016_2017